Daxil olQeydiyyat

UŞAQLARLA SƏYAHƏT ÜÇÜN İDEAL 10 ŞƏHƏR

OKTYABR 14, 2019 4 dəq. oxu
UŞAQLARLA SƏYAHƏT ÜÇÜN İDEAL 10 ŞƏHƏR

Gənclik illərindən dünyanı kəşf eləmək arzusuna düşürsən, tək başına səyahətlərə çıxırsan.  Daha sonra evlənirsən, bu dəfə də cütlük olaraq gəzməyə başlayırsan. Görürsən ki, cüt gəzmək tək gəzməkdən daha maraqlı imiş. Birlikdə günəşin doğuşunu izləmək, gecənin gec saatlarına qədər gəzdiyin şəhərin gecə həyatını kəşf etmək, qaçırdığın avtobusa görə vağzalda gecələmək kimi macəraların olur. 

Oops!!! Daha sonra uşaq doğulur. Gəzmək qurtardı. Nə edək?! Evdə oturaq?! Kim deyib ki, uşaqla gəzmək olmaz! Uşaqla uşaq olub səyahəti daha da maraqlı etmək olar. Düzdü uşaqla səyahətin bəzi çətinlikləri var, məsuliyyəti var, gecə həyatı yoxdur, biraz əlavə xərci var, artıq vağzallarda yata bilmirsən amma o qədər də çətin məsələ deyil. Uşaqla səyahətin bəzi qaydaları var ki, onlara əməl etsən çox rahat bir səyahət etmiş olarsan. Mühüm olan düzgün səyahət planı qurmaq və uşaqla səyahət zamanı vacib olan məqamları unutmamaqdır.

İlk olaraq vacib olan məqamları qeyd edim. Hansı ki, əvvəllər 1 backpack-lə yola çıxırdınsa, artıq uşaq üçün əlavə geyim, ilk yardım dərmanları, yolda başını qatmaq üçün oyuncaq və ya rəngləmək üçün dəftər, qələmlər, çox məsləhət görülməsə də təcili vəziyyətlərdə cizgi film və ya oyun yüklənmiş planşetlər baqajın əsas hissəsini təşkil edir. Digər mühüm olan məqam isə düzgün səyahət planı qurmaqdır, uşaqla gedilə biləcək yerləri araşdırmaqdır. Çünki, səyahət edəcəyimiz hər şəhər uşaq dostu olmur. Uşaqla səyahət ediriksə, elə məkanlar seçməliyik ki, həm uşaqlar üçün maraqlı, öyrədici yerlər olsun, həm də bizim üçün də yorucu bir seyahət olmasın. 

Bu blog yazımda mən sizin işinizi asanlaşdırmaq üçün uşaqla səyahət edilə biləcək 10 şəhər haqqında məlumat verəcəyəm. Həmçinin, həmin şəhərlərdə uşaqla gəziləcək yerlərdən danışacağam, hansı ki, uşaqlı ailələrin səyahət öncəsi ən çox maraqlandıqları məsələlərdəndir. Bir sözlə, bu yazını oxusanız rahatlıqla uşaqlarınızla səyahət planı qura bilərsiniz.

 

Amsterdam, Hollandiya 

 

Nədənsə Amsterdam deyəndə ağıla gələn ilk şey gecə həyatı, Red light küçəsi, məşhur cookie olur. Amma əslində Amsterdam uşaq dostu bir şəhərdi. İstər kanallarda qayıq turu, istər yaşıl parkları, istər muzeyləri uşaqların marağına səbəb olacaq. Bu siyahıya Vondelpark, Madame Tussauds museum, Tropenmuseum, Nemo Science Museum, Amstelpark, Hortus Botanicus, Oosterpark, Micropianı, Efteling atraksion parkı və s. əlavə etmək olar. Nemo muzeyi uşaqlar üçün təcrübə meydançası sayıla bilər. Məktəbdə öyrəndikləri fizika qanunlarını təcrübələrlə sınaqdan keçirtmələri onlar üçün əsl həyəcan olacaq. Bu sadəcə uşaqlar üçün deyil, həmçinin sizlər üçün də maraqlı olacaq. Odur ki, ürək rahatlığı ilə Amsterdamı uşaqla səyahət edə bilərsiniz. Nemo Science Museum bilet qiymətlərinə aşağıdakı linkdən baxa bilərsiniz.

Daha ətraflı

 

Paris, Fransa

 

Paris cütlüklər üçün romantik şəhər sayılsa da, uşaqlar üçün də Disneyland deməkdir. Sadəcə uşaqların deyil, bir çoxumuzun da uşaqlıq arzularından biri olub Disneylandı görmək. Odur ki, bu arzumuzu övladlarımızla birlikdə yaşayaq. Kaliforniyadakı, Tokyodakı, Floridadakı, Hong Kongdakı Disneyland-ə gedə bilmirsinizsə, bizə ən yaxın olan Parisdəkinə gedə bilərsiniz. Uşaqla Paris səyahəti düşünürsünüzsə, 1 günü Disneyland-ə ayırmağınızı tövsiyə edirəm. Parisdən 35-40 dəqiqəlik məsafədə olan Marne la Vallee bölgəsində yerləşən parka RER A qatarı vasitəsi ilə gedə bilərsiniz. İki parkdan ibarət olan ( Disneyland Park və Walt Disney Studios Park ) Disneyland-in bilet qiymətlərinə aşağıdakı linkdən baxa bilərsiniz. Onu da qeyd edim ki, qiymətlər hər sezona görə dəyişir, yaxşı olar ki, daha öncədən qiymətlərə baxıb ona görə səyahətinizi planlayasınız.

Daha ətraflı

 

Valensiya, İspaniya

 

Növbəti uşaqlarla gəzilə biləcək şəhər Valensiyadan danışım. Valensiya demək olar ki, uşaqlarla birlikdə vaxt keçirmək üçün ən ideal şəhərlərdən biridir. İstər muzeyləri, istər zoo parkları, istərsə də yay aylarında qızmar dənizi ilə uşaqların sevimli şəhərinə çevriləcək. O qədər maraqlı yerlər var ki, uşaqlar sizi heç yormadan vaxtın necə keçdiyini bilməyəcəksiniz. Valensiya Bioparkı, Natural Science Museum of Valencia, Gulliver Park, Museo Fallero, Museu de les Ciencies Principe Felipe, L’Oceanografic Valensiyada uşaqla gəzilə biləcək məkanlardır. Valensiyanın L'Oceanogràfic akvariumu Avropanın ən böyük akvariumudu. Dünyadakı sıralaması isə 4-cü yerdədi.  Bu akvariumun bilet qiymətlərinə aşağıdakı linkdən baxa bilərsiniz.

Daha ətraflı

 

London, İngiltərə

 

London uşaqla gəziləcək ən rahat şəhərlər sırasındadır. Daha çox yaz, yay aylarında gedilməyi məsləhətdir. Hər tərəfi yamyaşıl parklar olan bu şəhərin ən gözəl mövsümü yaz, yay aylarıdır mənə görə. Hyde Parkı ilə, girişi pulsuz olan muzeyləri ilə, London Eye, Big Beni ilə uşaqların marağını cəzb edəcək bir şəhərdir. Bundan başqa Crystal Palace parkındakı Dinasour Lake ətrafındakı dəmirdən olan böyük dinozavrlar çox diqqət çəkicidirlər. Harry Potter sevənlər üçün London yaxınlığında olan Hertfordshiredə yerləşən Harry Potter studiyalarını görmədən getmək günah olar. Harry Potter studiyalarına tur əldə etmək üçün aşağıdakı linkə keçid edə bilərsiniz.

Daha ətraflı

 

Rovaniemi, Finlandiya

 

Sadəcə uşaqların deyil, elə böyüklərin də özlərini nağıllar aləmində hiss edəcəkləri bir məkan. Qış nağılının yaşandığı Laplandiya əslində sadəcə Finlandiyadan ibarət deyil. Rusiyanın, İsveçin, Norveçin ve Finlandiyanın şimal torpaqlarını əhatə edən bu ərazinin ən turistik şəhəri Rovaniemi sayılır. Əlbəttə, buna səbəb hər kəsin Santa Clausu görmək arzusudur. Santa Clausun evi Rovaniemidə yerləşir. Siz sadəcə Santa Clausu deyil, Huskylərin qarda sürdüyü xizəklərə minə bilərsiniz, qütb ayılarını, maralları görə bilərsiniz. Ən əsası həyatınızda izləyəcəyiniz ən möhtəşəm mənzərəni - qütb parıltısını ( aurora borealis ) görə bilərsiniz. 

 

Dubay, BƏƏ

 

Dubay uşaqla gediləcək şəhərlər sırasında mütləq olmalıdır, çünki burda uşaqların əylənə biləcəyi o qədər atraksiyonlar var ki, bütün günlərini sizi yormadan keçirə bilərlər. Havanın temperaturunun 20-25 dərəcə olduğu yanvar-fevral ayları Dubay səyahəti üçün ən ideal vaxt sayıla bilər. Dubayda səhra safari turuna qatılaraq uşaqlarınıza maraqlı bir təcrübə yaşatmış olarsınız. Həmçinin, Dubayda dünyanın ən böyük akvariyumlarını görmüş olacaqsınız. Bunlardan biri Dubai Mall’da yerləşəni Dubai Aquarium digəri isə Atlantis Palm’da yerləşən The Lost Chambers akvariyumudur. Aşağıdakı linkdən keçid edib The Lost Chambers akvariyumunun bilet qiymətlərinə baxa bilərsiniz.

Daha ətraflı

 

Rust, Almaniya

 

Rust şəhərinin adı çox məşhur olmasa da Avropada Disneylanddan sonra ikinci ən böyük atraksiyon parkı bu şəhərdə yerləşir. Almaniyaya yolunuz düşsə, bu şəhərə də baş çəkib uşaqlarla maraqlı vaxt keçirə bilərsiniz. Həmçinin, Rust şəhəri Strasburqla 1 saatlıq məsafədə yerləşir. Yolüstü Strasburqa da səyahət edə bilərsiniz. Europa-Parkın bilet qiymətlərinə aşağıdakı linkdən baxa bilərsiniz.

Daha ətraflı

 

Billund, Danimarka

 

Uşaqlarla gəziləcək yerlərdən biri də Danimarkadır. Danimarkının bir çox şəhəri uşaqla səyahət üçün əlverişli olsa da Lego sevən uşaqların ilk görmək istədiyi yer Legolandin yerləşdiyi Billund şəhəridir. Legodan hazırlanmış bu kiçik şəhərcik uşaqlar üçün unudulmaz səyahətin bir parçası olacaq. Aşağıdakı linkdən Legolanda giriş biletinin qiymətləri ilə tanış ola bilərsiniz.

Daha ətraflı

 

Vyana, Avstriya

 

Avropanın mədəniyyət mərkəzi sayılan bu şəhəri gəzmək sadəcə sizin deyil, övladınızın da dünyagörüşünə müsbət yöndən təsir edəcək. Klassik musiqinin vətəni sayılan Vyana küçələrini gəzərkən hər tərəfdən klassik musiqinin sədaları eşidilir. Sadəcə sarayları, muzeyləri, opera binaları ilə deyil, həmçinin uşaqlarınızın diqqətini çəkəcək məkanları ilə də Vyana yaddaşınızda ən maraqlı şəhər kimi qalacaq. Vyanada uşaqla gəziləcək yerlərdən olan Təbiət Tarixi Muzeyi ( Naturhistorisches Museum ) və Kəpənək Evi ( Butterfly House ) uşaqlar üçün unudulmaz məkanlardan olacaq. Vyana gedib Musiqi Evini ( Haus Der Musik ) görməmək günah olar. Bəlkə də bu muzeyi gəzməklə övladınızın musiqiyə olan həvəsini kəşf edərsiniz. Musiqi Evinin giriş şərtləri ilə tanış olmaq üçün aşağıdakı linkdən keçid edə bilərsiniz.

Daha ətraflı

 

İstanbul, Türkiyə

 

Uşaqlarla səyahət üçün yuxarıda saydığım şəhərlərin hamısı viza tələb edən şəhərlərdir. Əgər viza almaq sizə çətin gələcəksə, sonuncu şəhər vizasız rahat gedib gələ biləcəyiniz İstanbul olsun. Ah İstanbul. Hamının qəlbini fəth edən bu gözəl şəhərdə uşaqlarla da vaxt keçirə biləcəyiniz məkanlar mövcuddur. Əslində, İstanbulda uşaqlarla gəziləcək yerlər siyahısını çox uzatmaq olar amma mən siyahını çox uzatmayıb ən çox görülməli yerlərdən yazacam. İstanbul Topqapı Sarayı, Rahmi Koç Muzeyi, Pelit şokolad muzeyi, İstanbul Oyuncaq muzeyi, Barış Manço muzeyi, İstanbul Akvariyumu, Dolmabağça Sarayı, Miniatürk, Darıca Zoo parkı, İstanbul Havaçılıq muzeyi, Vialand atraksiyon parkı İstanbulda uşaqla gəziləcək məkanlardır. Vialand ailəlikcə həm əylənib, həm də alış-veriş edə biləcəyiniz bir məkandır. Son zamanlarda adı dəyişdirilərək İsfanbul olmuşdur. Aşağıdakı linkdən İsfanbulun giriş qiymətlərinə baxa bilərsiniz.

Daha ətraflı

 

 

Mətndə bir səhv gördünüzmü? Mətni seçin və klaviaturada Enter düyməsini basaraq bizə deyin.